MKF mynd 2016 logo

Betri heimatænastu og eldrarøkt

Við størstu virðing fyri teimum, sum hava bygt og lagt lunnar undir okkara væl útbygda land, og sum nú treingja til frið eftir eitt langt lív á arbeiðsmarknaðinum, fer Tjóðveldi at hjúkla um eldrarøktina og heimatænastuna. Teimum, eins og okkum sjálvum, ynskja vit sjálvsagt ein góðan aldurdóm.

Jú, sanniliga skal tøkkin til teirra gevast við, at vit fara at styrkja um heimatænastuna. Eisini fara vit at veita fleiri tilboð, soleiðis at fólk kunnu vera verandi heima hjá sær sjálvum, uttan at vera bangin og óttafull. Eingin skal kenna seg einsamallan. Børn teirra, sum eru búsitandi uttanlands, skulu eisini vita, at foreldrini eru í góðum hondum hjá Tórshavnar kommunu.

Vit vilja styrkja og víðka Heimatænastuna. Vit vilja seta fleiri heitar hendur á ellis- og røktarheimini. Eins og vit vilja teimum, ið eru rakt av demens, heim og tilboð.

Tilboðini skulu verða fleiri, so tey gomlu kunnu velja sær tær tænastur, tey halda seg hava brúk fyri. Meðan fleiri standa á bíðilista, búgva eisini eldri fólk á røktarheimi, sum eru nóg væl fyri til at tey, við røttu hjálpini, klára seg heima nøkur ár afturat. Tí skulu vit styrkja Heimatænastuna. Nógvu og vælumtóktu fyribyrgjandi tilboðini, bæði kropslig, handalig og sosial, skulu gerast enn fleiri.

Okkara eldru borgarar hava tørv á ymiskum bústaðarloysnum. Valmøguleikin eigur ikki at vera millum eini stór sethús ella eitt pláss á røktarheimi. Tí er eisini neyðugt beinanvegin at útvega fleiri íbúðir, vardar bústaðir og umlættingarpláss.

Tað er bráðneyðugt at útvega teimum, ið verða rakt av demens, heim og tilboð beinanvegin. Tørvur er á demensheimi, dagtilboði til fólk við demens, fleiri møguleikum til umlætting í styttri og longri tíð. Aðalmálið er at eisini fólk við demens kunnu vera heima sum longst og fáa neyðugu hjálpina har.

Mangan kann tað tykjast sum, soleiðis sum politiskar avgerðir verða tiknar og samfelagið innrættað, at hesir somu politikarar ikki sjálvir gerast gamlir. Hetta eru vit í Tjóðveldi tilvitað um, tí eyðkenni okkara er fjølbroytni, ið er ein fyritreyt fyri at tær røttu avgerðirnar verða tiknar. Vit fara at leggja okkum eftir og tillaga alla skipanina við heitum hjørtum. Akkurát soleiðis og eftir tí leisti, sum vit sjálvi ynskja okkum árini eftir arbeiðsmarknaðin og ellisárini.

Marin Katrina Frýdal, býráðslimur

Tjóðveldi

mk2_560x460

Fleiri og fleiri súkkla til arbeiðis

Tað gerst alsamt meira og meira vanligt, at fólk súkkla til og frá arbeiði í Havn. Henda morgunin í september stóðu ikki minni enn sjey súkklur hjá starvsfólkum uttanfyri skrivstovuna hjá Landsverk á Tinghúsvegnum.

Súkklur uttanfyri skrivstovu í miðbýnum

Súkklur uttanfyri skrivstovu í miðbýnum

Hóast langt er á mál, til at Havnin kann kalla seg ein súkklubý, so eru tað tó fleiri og fleiri, sum velja henda flutningsháttin at koma til arbeiðis. Tað er í hvussu so er ein nógv skjótari háttur at koma ígjøgnum nógvu ferðsluna um morgnar, heldur enn í bili, um tú t.d. býr í Hoyvík og arbeiðir í miðbýnum. Nógvar sniðgøtur eru, ið eru bæði tryggar og hugnaligar at súkkla eftir. Hóast at tað eisini stundum er neyðugt at fara út ímillum allar bilarnar, og at hetta stundum kennist ótryggt, so er súkkling ein frálíkur háttur at ferðast uppá.

mk2_560x460

Fólk skulu eisini búgva í miðbýnum

lidahus

Liðahúsini

Húsini í Liðagøtu, beint omanfyri Steinatún. Har hevur familjuráðgevingin hildið til, eins og náttaravnarnir eisini hava havt atgongd til húsið.

Í samband við, at býráðið keypti bygningin hjá BankNordik til at húsa umsitingini hjá Tórshavnar kommunu í, var treytin, at onnur hús, sum kommunala umsitingin hevur húsast í, skuldu seljast. Tað er í hesum sambandi, at eg havi skotið upp, at tá ið umrøddu húsini verða sett á sølulista, skal ein bústaðarskylda fylgja við teimum, soleiðis at hendan skyldan kann fyribyrgja, at tey aftur enda sum skrivstovur. Hetta er ein gyltur møguleiki hjá kommununi at seta spónin í greytin og vísa vilja til at gera tað fólkaríkt aftur í býnum. Hetta er bert eitt av mongum tiltøkum, har kommuna eigur at ganga undan og fremja tað í verki, sum kann vera við til at skapa lív og trivnað aftur í miðbýnum.

magn_heinasonarg

Magnus Heinasonargøta

soljugota

Húsini í Sóljugøtu, vórðu brúkt til kvøldskúla, áðrenn alt tað virksemi flutti oman í Vørðsluna, í J. H. Schrøters gøtu.

fr_petersens_gota

Húsini á horninum Fríðriks Petersens gøta / Jóannesar Paurssonar gøta. Har hevur sosial deild hjá kommununi havt sítt virksemi.

mk2_560x460

Bygdagøturnar

Bygdagøturnar, sum ættarlið aftan á ættarlið undan okkum hava traðkað og tillagað ígjøgnum øldir, og sum í gomlum døgum vóru samferðsluleiðirnar ímillum bygdir, verða nú settar á breddan í Tórshavnar kommunu.

Fyri nøkrum árum síðani var nakað av kjaki um, hvør hevur ábyrgdina av at halda bygdagøturnar viðlíka, og løgfrøðiligt álit kom til ta niðurstøðu, at tað var ivasamt, um hetta var ábyrgd kommunurnar. Stígur kom í málið, og hildið varð, at býráðið átti at hugsavna seg um egin økir, og tey, sum kommunan hevur fulla ábyrgd av. Men bygdagøturnar hava við jøvnum millumbili verið tiknar fram til viðgerðar, og nú tykist í hóming bæði vilji og áræði í býráðnum at fara undir hesa verkætlan.

Nógvar bygdagøtur í kommununi

Bygdagøturnar eru nógvar í kommununi; úr Havnini er gøta til Kirkjubøar, Velbastaðar, Syðradals, Norðradals, inn á Sund og norður eftir oyggj. Harumframt vóru eisini tær gomlu gøturnar millum Havnina og ávikavist Hoyvík og Argir, men her er at kalla vorðið samanvaksið millum bý og bygdir. Umframt omanfyri nevndu gøtur úr Havnini, eru eisini gøtur ímillum bygdirnar; av Argjum yvir Reynið til Kirkjubøar, úr Kirkjubø inn til Velbastaðar, av Velbastað til Syðradals, úr Syðradali til Norðradals, úr Hoyvík á Hvítanes og inn í Kallanes, úr Kollafirði til Kaldbaks, av Sundi í Kaldbaksbotn og til Kaldbaks.

Í Nólsoy er gøta úr bygdini og út á Borðuna, og í Hesti er gøta úr bygdini og suður á Hæl.

Bygdagøturnar stóran týdning

Hesar gøtur hava sera stóran týdning fyri okkum nú á døgum, men ein annan týdning, enn tá ið tær vóru lívsneyðugar farleiðir millum bygdir í handils- ella læknaørindum, í kirkju, eftir ljósmóðir ella við kistuni á tí síðstu ferðini. Umframt tað, at bygdagøturnar hava bæði siðsøgulig og mentanarlig virðir, so geva tær eisini okkum møguleikan á bæði lættligan og lógligan hátt at koma út í vøkru og fríðu náttúruna, eins og tær eru við til at avmarka slitið á náttúruna. Gongutúrar í haganum eru bæði heilsu- og sálarbót fyri okkum, har vit kunnu njóta friðsælu, náttúruna og ríka djóralívið. Stutt er til stórsligna og óspilta náttúru, og nógv støð hava eisini bæði áhugaverdar søgur og sagnir at siga frá, ið vit eisini hava ábyrgdina av at bera víðari til okkara eftirkomarar. Tað hevur týdning, at vit í øllum lutum hjúkla um okkara søguligu og siðsøguligu virðir, tí vavið á einum landi er eisini søgan aftur í farnar tíðir, og hetta er við til at evna tað lívið og tann samleika, vit hava í okkara gerandisdegi nú á døgum. Tað er avgerandi neyðugt fyri okkum sum land og tjóð, at vit ikki lata søguna doyggja.

Rørsla og náttúran

Nútíðar gerandisdagurin krevur sera nógv av okkum, og tey allarflestu av okkum sita niðri og arbeiða allan dagin. Henda gongd hevur elvt til, at sokallaðu vælferðarsjúkurnar eru vorðnar ein trupulleiki fyri samfelagið. Vit mugu tí royna at fáa tær rørslur, sum skulu til, uttanfyri arbeiðstíðina. Og her er tað, at kommunan eisini hevur tikið sína ábyrgd í hesum máli við at gera gøtur ímillum býlingar í býnum og í bygdunum, eins og súkklubreytir eru settar á dagsskránna í kommununi. Tað er at gleðast yvir, at fólk eru farin at virðismeta og geva føroysku náttúruni meira ans enn nakrantíð, og tað er vorðin ein sportur at koma uppá so nógvar fjallatindar sum møguligt. Men vit mugu ongantíð gloyma, at tað eru ikki øll, sum náa uppá tindarnar, og tí skal kommunan syrgja fyri, at gøturnar verða gjørdar góðar og slættar at ganga eftir, og væl merktar við varðum. Eisini er hetta kærkomið hjá vaksandi hópinum av ríðingarfólki og teirri nýggju ítróttini við fjallasúkklum.

Bygdagøturnar fara at verða meira brúktar, eins og tær fara at vísa okkara borgarum á enn fleiri náttúruperlur, og hetta fer somuleiðis at betra um fólkaheilsuna. Endamálið er at geva øllum – yngri sum eldri – eitt gott og hugnaligt høvi at røra seg og at uppliva náttúruna. Tað er ein sannroynd, at tá ið kommunan betrar um karmarnar og ger umstøðurnar lokkandi, so dregur hetta brúkarar at sær tí borgarin tekur hesar møguleikar til sín. Eitt av nógvum dømum um hesa gongdina er gøtan kring Vesturvarða, sum varð gjørd fyri nøkrum árum síðani. Har ganga, renna, ríða, súkkla í hundraðtali av fólki hvørja viku, í øllum veðrið og árið runt.

Kærkomið fyri ferðavinnuna

Ætlanin er í fyrstu atløgu at gera eina skipanarætlan fyri bygdagøturnar í allari kommununi. Síðani er mín vón, at tað fer at eydnast at fáa undirtøku millum býráðslimir at fáa ætlanina á langtíðar íløguætlanina, ið er til viðgerðar í býráðnum í hesum døgum. Soleiðis kunnu allar bygdagøtur í kommununi eftir nøkrum fáum árum gerast góðar at brúka og verða væl merktar. Niðurrapaðir varðar verða laðaðir uppaftur, og við hesum gerast bygdagøturnar aftur kærkomnar og tryggar farleiðir hjá borgarunum. Henda ætlan hevur stóran týdning fyri ferðavinnuna, tí her verður talan um skipaði viðurskiftir, har náttúra, søga, rørsla og mentan renna saman í eina eind, ið er ein søluvøra sum føroyska ferðavinnan spyr eftir.

Alt málið eigur sjálvsagt at verða framt í verki í góðum samstarvi við lendisánarar og viðkomandi myndugleikar.

 

 

mk2_560x460

Náttúrurenning við Kerjar 2012

Upphiting

Upphiting

Tað gleðir meg at fáa heiðurin at seta náttúrurenningina við Kerjar, sum Hvirla og Hotel Føroyar skipa fyri.

Í lýsingini fyri tiltakinum ljóðar m.a. soleiðis:

“Allir túrarnir eru í bleytum lendi sum er gott fyri likamið, reinari luft og frálíka vakrari náttúru. Hetta er uppliving, ið stimbrar likam og sál fyri bæði stór og smá, ung og gomul.”

Hetta er ein góð lýsing og sampakkar ógvuliga væl við málsetning kommununnar fyri gøtuskipanunum.

Kommunan hevur síðstu árini veruliga lagt seg eftir at gera enn fleiri gøtur.

Endamálið hjá kommununi er, at gøturnar skulu gera tað lagaligt og lokkandi hjá fólki at fara til gongu, samstundis sum tær eisini skulu stytta um farleiðina ímillum heim, arbeiði, skúla o.a. Gøtuskipanirnar eru við til at stuðla undir, at bilurin verður valdur frá, og at tað heldur verður farið til gongu. Soleiðis eru gøturnar ein liður í at stuðla undir rørslu og ferðslutrygd, og harvið eisini betri fólkaheilsu.

Aðrar gøtur eru til beinleiðis náttúruupplivingar, har tú kann koma út í Guds fríðu náttúru, ganga órógvað, uttan asfalt, men við bleytum lendi undir fótum og uttan larm og os frá bilum.

Tað er ein sonn sálarbót at ganga niðan úr býnum á kvøldi um Svartafoss og niðan í Hoyvíkar. At kunna traðka úr meldrinum í býnum, av asfaltinum, úr bilferðsluni og teimum skiggjandi gøtuljósunum og út í náttarmyrkrið. Tú verður eitt við náttúruna – slíkur túrur er ein góð uppliving og kann mangan verða ein góð avrunding av meldrinum í býnum.

Fjallasúkkling hevur eisini verið roynt her áður, eins og við gøturnar í Hoydølum. Vit gleðast yvir slíkar kappingar og upplivingar, men hesar gøtur eru eisini hvønn tann einasta dag til stóra gleði og gagn fyri allar borgarar.

Tað er sera týdningarmikið, at feløg sum Hvirlan o.o. taka stig til at skipa fyri tiltøkum av slíkum slag sum í dag, tí fólk dáma at koma saman. Tí eru hesi tiltøk við til at breiða kunnleikan um hesar gøturnar, og harvið fara fleiri og fleiri fólk at brúka gøturnar. Tað er hetta, sum er endamálið, og tí er kommunan sera takksom fyri slík tiltøk.

Eg haldi, at eg við vissu kanna siga, at tað eru nógv fólk, sum ongantíð hava verið í viðarlundini í Kerjum. Men eftir dagin í dag, fara ivaleyst fleiri av okkum at gera onkran túrin niðan aftur higar, har vit kanska taka onkran við okkum. Soleiðis eru slík tiltøk ein sannur boðberi.

Eg fari at nýta høvið at takka Johannesi Jensen, stjóra á Hotel Føroym, fyri sítt áhaldandi dirvi og treiskni at gera tað enn betri her í kommununi. Tá, ið Johannes fyrst hevur fingið eygað á ein møguleika, á ein vakran blett sum ikki verður sæddur, ella ein møguleika, sum átti verði royndur, so brettir hann upp um armar, vendir sær til teir røttu myndugleikarnar við útrættari hond um samstarv, soleiðis at úrslitið verður ein win – win støða; bæði fyri vinnuna, fyri borgararnar, fyri kommununa, ja, fyri okkum øll. Stóra takk fyri tað; kommunan hevur altíð brúk fyri initiativríkum fólki. Gerið tí sum Johannes, bankið uppá, tí kommunan er altíð til reiðar at vera viðspælari og at skapa karmarnar fyri ábótum í okkara býi og kommunu.

Nútíðar gerandisdagurin krevur sera nógv av okkum, og tey allarflestu av okkum sita niðri og arbeiða allan dagin. Henda gongd hevur elvt til, at sokallaðu vælferðarsjúkurnar eru vorðnar ein trupulleiki fyri samfelagið. Vit mugu tí royna at fáa tær rørslur, sum skulu til, uttanfyri arbeiðstíðina. Og her er tað, at kommunan eisini hevur tikið sína ábyrgd í hesum máli við at gera gøturnar. Ynskiligt er, at tær gomlu varðagøturnar millum bygdirnar í kommununi eisini verða dagførdar. Hóast talan ikki er um kommunala jørð, so eigur kommunan at syrgja fyri, at hetta verður gjørt.

Fari at enda við at takka Hvirluni fyri tiltakið, “Náttúrurenning við Kerjar”. Takki fyri, at tit eru við til at vísa borgarunum á okkara náttúruperlur og at betra um fólkaheilsuna. Endamálið er at geva øllum – yngri sum eldri – eitt gott og hugnaligt høvi at røra seg og at uppliva náttúruna. Tað er upp til hvønn einstaka luttakandi, um ein rennir ella gongur teinin; mest umráðandi er at vera við.

Takk fyri

Marin Katrina Frýdal, býráðslimur

24.11.2012

mk2_560x460

Súkklur í býbussarnar

Soljóðandi uppskot havi eg biðið um at fáa á skrá í teknisku nevnd mikudagin 12. juni 2013:

Áhugin fyri at súkkla til og frá arbeiði, frítíðarvirksemi o.ø. tykist at vera vaksandi, og er ynski frá borgarum um at kunna fáa loyvi at taka súkklurnar við í býbussaranr. Kommunan eigur at stuðla súkklumentanini. Umframt at súkkling gevur rørslu og vælveru, so gevur hon eisini náttúru- og mentanarupplivingar. Kommunan hevur síðstu árini givið teimum súkklandi meira ans, og er tað er vorðið ein natúrligur partur at taka súkkling við inn í vega-, gøtu- og byggiverkætlanir kommunurnar. Nú er tíðin búgvin at fara eitt stig víðari, við at lata Bussleiðina og súkklandi taka tøk saman, stuðla og fáa gagn av hvørjum øðrum, til frama fyri kollektivu ferðsluni, umhvørvinum og fólkaheilsuni.

Tiltakið fer eisini at lætta um trýstið á parkeringsmøguleikarnar í miðbýnum, tí við tiltakinum fáa fólk, sum arbeiða í miðbýnum og búgva í útjaðaranum av kommununi t.d. í Hoyvík, á Norðasta Horni, á Argjahamri, í Kollafirði, á Velbastað og aðrastaðni við, gagn av hesum møguleika og um/ella tá ið tað er ov møtimikið at súkkla báðar vegir, um t.d. illveður brestur á ella annað.

mk2_560x460

Sjúkrarøktarfrøðingar, dagstovnarnir og Bussleiðin

Tjóðveldi hevur, sum tann einasti flokkurin havt eina skipaða valfundarrøð kring alla kommununa. Vit hava hildið fundir í Kaldbak, í Nólsoy, á Velbastað (ið eisini var fyri Kirkjubø, Hest, Koltur, Norðradal, Syðradal) í Kollafirði, á Argjum, í Hoyvík (ið eisini var fyri Hvítanes) og í Havn.

Hetta vóru góðir og gevandi fundir, bæði fyri okkum sitandi býráðslimir, og fyri nýggju valevnini. Nógv rósandi orðini vóru á leiðini fyri tað góðu býráðsleiðsluna tey síðstu 8 árini, men tó vóru eisini nógvar atfinningar, treyðugt so. Fleiri av atfinningunum vóru um slíkt, sum ikki kostar pening, men hinvegin bert hugburð og vilja. Onnur ynski kostaðu bæði vilja og pening. Atfinningar og ynskir vóru um t.d. leysgangandi hundar, vetrarfriðing, ferðslutrygd, fimleikahøll, dagstovn, frítíðarvirksemi, dagtilhald o.s.fr.

Bussleiðin varð umrødd á øllum fundunum. Samanumtikið eru fólk sera glað fyri Bussleiðina, men tó vóru fleiri ynskir um at broyta ymsar leiðir í ferðaætlanini, fáa onkran eyka túrin, koyra fyrr um morgnarnar, koyra seinni um kvøldarnar og at koyra um vikuskiftini.

Bussleiðin hevur verið hjartabarnið hjá mær hesi 8 árini, eg havi sitið sum forkvinna í teknisku nevnd. Hesi árini hevur verið arbeitt miðvíst og stigvíst við at menna Bussleiðina, og eri eg tí sera glað fyri at hoyra, hvussu vælumtókt Bussleiðin er millum borgararnar.

Dagstovnatilboð, har latið verður upp kl. 06.00

Fleiri sjúkrarøktarfrøðingar o.o. sum arbeiða á Landssjúkrahúsinum, serliga tey, sum hava makar, ið arbeiða á sjónum og uttanlands, ella tey, ið eru stakir uppihaldarar, hava víst á, at dagstovnarnir eiga at lata upp fyrr um morgnarnar, soleiðis at tey kunnu vera við í vaktarskipanini og møta til arbeiðis kl. 7 á morgni. Umráðandi er, at kommunan leggur soleiðis til rættis og skipar karmarnar, at samsvar er millum tørv og tænastu. Kvinnurnar flyta av landinum, og tí er alneyðugt, at vit hjúkla um hesi kvinnuarbeiðsplássini. Tí eigur ein roynd at verða gjørd við einum dagstovni, sum letur upp longu kl. 6 á morgni.

Arbeitt eigur at verða fram ímóti, at Bussleiðin fer at koyra um vikuskiftini, og at Bussleiðin eisini fer at koyra fyrr um morgnarnar og seinni út á kvøldarnar. Eisini eigur ein dagstovnur at vera í Havn, ið letur upp fyrr á morgni, til gagns fyri fólk, sum byrja at arbeiða kl. 7 á morgni. Hesum ábótum fari eg at arbeiða fram ímóti, um eg verði afturvald í býráðið.

Marin Katrina Frýdal, býráðslimur fyri lista E

mk2_560x460

Leiðin fram í felag

Tórshavnar kommuna skal vera rúmlig, og pláss skal vera fyri øllum. Og eingin skal føla seg útstoyttan ella forfylgdan. Alneyðugt er at leggja soleiðis til rættis, at fjølbroytni er galdandi, at arbeiðsmarknaðurin er rúmligur, og at fleiri vard størv verða útvegað.

Bústaðir

Øll skulu hava møguleika fyri at útvega sær ein bústað. Nú lógarheimildin loksins er komin, varð beinanvegin farið til verka, og arbeiðir býráðið nú saman við øðrum at byggja fjøltáttaðar bústaðir, s.s. leigu-, luta-, lestrar-, vardar- og eldraíbúðir. Endamálið er at skapa nýggjar, kreativar og hóskandi bústaðaloysnir, soleiðis at bústaðamarknaðurin sum heild verður betri og meira fjøltáttaður. Bert at kunnu velja ímillum dýrar sethúsaloysnir fyri milliónir, ella dýrar privatar kjallaraíbúðir, verður vónandi skjótt søga.

Ymiskleiki

Allir aldursbólkar skulu vera javnt virdir og hava rætt til somu tilboð. Fleiri trivnaðartilboð eru útvegaði bæði til ung og eldri. Býráðið hevur samtykt og sett pening av til at menna hesi enn meira í 2013. Kvøldskúlin við omanfyri 100 undirvísingartilboðum, ið fevna um alt frá vanligari bókligari og handaligari frálæru til royndarfyrireikandi lesna, ið endar við próvtøku, eigur at mennast enn meira. Tórshavnar kommuna kann ivaleyst gerast enn betur at veita møguleikar fyri t.d. vardum størvum til borgarar ið fella uttanfyri vanligu treytirnar á arbeiðsmarknaðinum.

Lestrarbýurin

Tórshavnar kommuna og vinnan eiga at stuðla Fróðskaparsetrinum, soleiðis at vit fáa eitt veruligt føroyskt universitet og eitt altjóða lestrarumhvørvi. Hóast hetta er ein landsuppgáva, so tolir málið ikki at bíða, meðan Fólkaflokkurin, Sambandsflokkurin, Sjálvstýrisflokkurin og Miðflokkurin keglast um tunlar og annars fonglast við at býta vinum og kenningum makrelloyvir, alt meðan landið alsamt spakuliga bløðir út.

Gjøgnumskygni

Vit hava ment umsitingina hjá Tórshavnar kommunu til at vera tað mest professionellu í landinum, og Tórshavnar kommuna er eitt arbeiðspláss við stórar atdráttarmegi og gevur starvsfólki fakligar avbjóðingar. Gjøgnumskygni í allar politiskar avgerðir, og alt umsitingarligt arbeiði, er fyritreytin fyri áliti.

Samhaldsfesti

Tað er so ymiskt, hvat vit vera borin til her í lívinum og eisini hvussu vit verða móttikin og hvussu alt laðar seg í lívi okkara. Vit eiga at leggja soleiðis til rættis, at tey sterkastu hjálpa teimum veikastu, og ein góð samhaldsføst Tórshavnar kommuna skal tryggja hesum. Hetta gera vit í dag t.d. við Bussleiðini, sum er ein góð samhaldsføst skipan. Barnaverndartænastan, skúlatannlækni, Býarbókasavnið, systkinaavsláttur, frípláss, Tilhaldið, Sølutrogið í Vágsbotn o.fl. eru dømi um góðar samhaldsfastar tænastur í kommununi, og slíkar skulu mennast og fjølgast.

Marin Katrina Frýdal, býráðslimur á lista E

mk2_560x460

Ósmædna Helena!

Eri noydd at koma við eini rættleiðing til Helenu Dam á Neystabø, tá ið hon í lesarabrævi, “Ráð at liva í Havn”, skrivar, at Javnaðarflokkurin hevur við góðum lógarsmíði tryggjað, at Húsalánsgrunnurin nú hevur neyðugu heimildirnar til at fara undir at byggja leigu-, luta- og lestraríbúðir. Og framhaldandi sigur hon, at fá mál hava so stóran týdning fyri framtíð okkara sum samfelag, sum at tryggja ungum fólki møguleikar at seta búgv í Tórshavnar kommunu, uttan at draga milliónaskuld upp á seg.

Býráðið hevur í áratíggju bíða eftir lógarheimildini frá løgtinginum til at fara undir leigu- og lutaíbúðabygging. Og Helena Dam á Neystabø umsat sjálv Húsalánsgrunnin frá 1998 til 2001. Hon noktaði tá Húsalánsgrunninum at virka í kapping við bankarnar á húsamarknaðinum. Í 2009 átti Javnaðarflokkurin fíggjarmálaráðharran, ið tók allar heimildir frá Húsalánsgrunninum, so hann bert fekk heimild at veita orkulán, og um somu tíð sat Helena Dam á Neystabø eisini í landsstýrinum.

Tað var Tjóðveldi sum legði trýst á minniluta samgonguna og syrgdi fyri at fáa víðkað heimildirnar hjá Húsalánsgrunninum til bæði at taka stig til og fíggja og reka leiguíbúðir, lestraríbúðir umframt lutaíbúðir og bústaðir til eldri og fólk við serligum tørvi. Og harumframt at kunna veita realkredittlán. Og eydnaðist hetta eftir ómetaliga stórt trýst frá Tjóðveldi beint undan valinum í oktober 2011, tá lógarbroytingarnar vórðu samtyktar.

Tað var eisini Tjóðveldi, sum upprunaliga setti Húsalánsgrunnin á stovn. Hann hevur havt ómetaliga stóran týdning fyri, at fólk við lág- og miðalinntøkum kundu seta føtur undir egið borð, og sum eisini var endamálið við grunninum. Nýggja navnið hjá Húsalánsgrunninum er <em>Bústaðir – Føroya bústaðafelag.</em> Umframt verandi virksemi á Húsalánsgrunninum verða Bústaðir somuleiðis ein týðandi leikari á bústaðamarknaðinum í framtíðini.

Í býráðnum navigera vit eftir hesi kærkomnu heimild. Kommunan og Húsalánsgrunnurin, arbeiða við fleiri verkætlanum um at byggja fleiri fjølbroyttar íbúðir; ávikavist bæði, í Mattalág, á Óðinshædd og á Berjabrekku.

Tað eigur og skal vera ein rættur hjá einstaklingum, lesandi, støkum uppihaldarum, eldri o.ø. at hava ein bíligan, tryggan, heilsu- og umhvørvis vinaligan bústað. Hesum verður arbeitt við í býráðnum, og helma verður ikki í, fyrr enn komið er á mál. Men tó kann eitt nýtt og øðrvísi býráð broyta kósina og, tí fari eg at heita á tykkum veljarar um at geva lista E stuðul til býráðsvalið, tí tað er tryggleikin fyri trivnaði og at ætlanirnar við at útvega bíligar leigu- og lutaíbúðir verður veruleiki.

Marin Katrina Frýdal, býráðslimur fyri lista E

mk2_560x460

Tórshavnar kommuna er lokomotivið

Vit mugu fyrireika okkum at taka ímóti framtíðini

Ein tann størsta avbjóðingin hjá einum politikara í eini høvuðsstaðarkommunu, sum okkara, er at tryggja trivnaðin og vælferðina hjá borgarunum. Somuleiðis er neyðugt, at Tórshavnar kommuna er eitt virkið lokomotiv at draga føroyska samfelagið fram á leið.

IMG_4684-600x250

Høvuðsstaðurin

Býurin og menningin

Kommunalpolitikarar mugu fylgja væl við í tí samfelagsligu menning, sum hendir í okkara grannalondum; tí tað eru hesi, ið vit kappast við um okkara egna unga fólk og um framtíðar lívskor her á klettunum.

Dentur má leggjast á at skapa og bøta um teir yvirskipaðu karmarnar í kommununi, øllum borgarunum at frama. Havnin skal vera býurin í hesi menning; við sjálvsagdari rúmd, til at menna bygdirnar í kommununi eisini.

Betri vinnumøguleikar í kommununi

Høvuðsstaðarkommunan eigur at fjálga um vinnumøguleikarnar á øllum plássum í kommununi. Fólkaríkasta kommunan í landinum hevur góðar møguleikar at leggja vælskipaðar karmar til rættis fyri verandi og nýggjum vinnugreinum. Tórshavnar býráð eigur at skipa ein formligan samstarvs- og samskiftispall við vinnulívið, t.d. kundi Havnarnevndin verði víðkað til eisini at fevnt um hesi málsøki.

Mentanarlívið skal styrkjast

Høvuðsstaðurin hevur eina sjálvsagda skyldu at ganga á odda í stríðnum at menna og styrkja umstøðurnar hjá føroyskum mentanarlívi, og at skapa góðar karmar fyri einum ríkum og fjølbroyttum mentanarvirksemi í kommununi. Tórshavnar kommuna má gera sítt til, at farið verður undir arbeiðið at gera eitt nýtt og tíðarhóskandi mentanar- og tjóðleikhús í næsta býráðsskeiði. At menniskjað ikki livir av breyði eina, eru vælkend vísdómsorð úr Halgubók, ið framvegis hava gildi.

Ein tíðarhóskandi høvuðsstaður er ein treyt fyri trivnaði

Nógvar kanningar vísa, at útjaðarabýir við dygdargóðum útbúgvingarmøguleikum standa seg nógv betur í kappingini frá altjóðagerðini.

Tíðarhóskandi yrkis- og miðnámsskúlar, og Fróðskaparsetur við viðkomandi frálæru og gransking, er vegurin framá. Tórshavnar kommuna má í samvinnu við landsmyndugleikarnar leggja doyðin á at skipa fyri hesum. Ungdómurin í lestrarørindum, ein hópur av vællærdum serfrøðingum, og samstarv millum vinnulív og Fróðskaparsetur, eru partar, ið skapa nýggjar møguleikar, lív og trivnað í býnum.

Marin Katrina Frýdal, býráðslimur fyri Tjóðveldi